Manifiestu
Una declaración d'independencia: la promesa de tratate como persona y non como datu. Esto ye lo que creemos y, sobre too, lo que la arquiteutura d'esti sitiu fai cumplir.
Esti manifiestu ye'l principiu rector de tolos proyeutos de Xiringase, la iniciativa web-editorial-cultural de base asturiana que ta detrás d'esta web. EMTI Fervienza ye ún d'esos proyeutos, y poro equí cada decisión téunica nace de les mesmes conviccciones.
Puedes lleer la versión completa y d'orixe nel sitiu del colectivu: el Manifiestu del Vínculu Dixital en Xiringase .
Declaración d'Independencia del Vínculu Dixital
A los arquiteutos del capitalismu de vixilancia, a los xigantes de la estraición algorítmica, a los mercadores de l'atención humana:
Venimos d'un territoriu que nunca vos pertenecía: la confianza. Nun tenéis construyío nada nél; namás deprendisteis a minalu, a fragmentar a les persones en perfiles y a vender los cachos.
Refugamos la estraición conductual a escala industrial. Refugamos que la atención humana seya materia prima y que la intimidá seya'l preciu por defeutu d'esistir na rede. Nun aceptamos que vixilar seya'l modelu de negociu y que'l consentimientu seya un llaberintu diseñáu pa perdese.
Nun venimos a humanizar la vuesa vixilancia nin a maquillala con axustes de privacidá. Venimos a demostrar que'l vuesu tiempu s'acabó: que se pue construyir daqué útil, abiertu y dignu ensin convertir a les persones en mercancía.
Lo que caltién cada llinia de códigu
-
El Vínculu ye soberanu
Yes persona, non oxetivu.
Nun midimos cuánto tiempu te retenemos nin diseñamos trucos pa enganchate. Nun aplicamos hipersegmentación sicolóxica nin persiguimos solombres pela rede. Atraemos mentes pela lluz del mensaxe: tas equí porque lo escueyes, non porque nun puedas salir.
-
Contar ye ciencia; identificar ye política
Memoria pal valor, amnesia pa la identidá.
Los nuesos sistemes saben reconocer la utilidá y l'impautu de lo que faemos, pero son incapaces de reconocer la to identidá. Contamos pa entender si'l conteníu val; nun identificamos pa perfilar a quien lu use.
-
Arquiteutura sobro promesa
Nun te pidimos que confíes: pidímoste qu'audites.
Nun hai confianza basada nes nueses pallabres, sinón nel códigu. La privacidá nun ye una casiella escondida nun menú nin una opción qu'haya qu'activar: ye l'estáu natural del sistema. Lo que dicimos que nun faemos, téunicamente nun se pue facer.
-
Márketin contestual, non acosu conductual
Queremos merecer la to confianza, non atrapar la to atención.
Refugamos el fingerprinting, la vixilancia cruciada y los perfiles invisibles. Si dalgún día hai recomendaciónes, van nacer del conteníu que tienes delantre, enxamás de siguite per tola rede. Nun comerciamos cola to atención.
-
Tresparencia radical
Ensin llaberintos, ensin trampes.
Refugamos los llaberintos de consentimientu y los dark patterns. La complexidá téunica nun tien que ser una ferramienta de dominación: lo que faemos cola teunoloxía ta escrito en claro, y lo que nun faemos tamién.
-
Soberanía de siliciu
La mente humana nun ye un recursu minable.
Apostamos por IA llocal, inferencia privada y modelos autoallugaos cuando ye aplicable. La intelixencia qu'usamos sirve pa ampliar les tos capacidaes, enxamás pa optimizar les tos compulsiones nin pa alimentase de ti ensin que lo sepas.
Nun son promeses: ye arquiteutura
Un manifiestu ensin práutica ye namás retórica. Poro, estos principios nun viven namás nesta páxina: tán escritos en cómo tratamos —o meyor, en cómo nun tratamos— los tos datos. Ensin analítica que t'identifique, ensin píxeles de siguimientu, ensin cookies de rastrexu, ensin fingerprinting.
Si quies comprobar qué significa tou esto en concreto, llei cómo cuidamos la to privacidá y en qué condiciones uses la web. Nun te pidimos fe: pidímoste qu'audites.
EMTI Fervienza ye un proyeutu de Xiringase, rexíu pol Vínculu Dixital. La privacidá nun ye una opción qu'activamos: ye'l suelu sobro'l que ta construyío tolo demás.