Gaiteru y músicu profesional
La so obra musical, la so discografía y el blog onde escribe sobro gaita asturiana y música tradicional.
Ver tever.es → Quién somos
Quién somos
EMTI Fervienza nace en 2026 de la mano de Tever Díaz García, gaiteru, docente ya investigador asturianu.
Fundada en 2026 Gaita asturiana · Tin whistle · Online
01
Por qué nace la escuela
La escuela fúndase con un oxetivu claru: espardir la música tradicional asturiana. Xunto a esi, un segundu exe igual d'importante: crear proyeutos d'innovación onde les nueves teunoloxíes s'axunten cola tradición.
Por agora, EMTI Fervienza opera de forma online, con clases individuales de gaita asturiana y tin whistle.
02
El fundador
Tever Díaz García lleva la gaita asturiana dende que yera neñu, n'Asturies. Ye Téunicu de les Enseñances Profesionales de Música na especialidá de Gaita pol Conservatoriu d'Uviéu, y la so formación musical complétase con años tocando en banda y deprendiendo de forma individual.
Xunto a la música, la so otra formación ye téunica: ye inxenieru informáticu. Esa doble raíz —gaiteru y téunicu— ye la que da forma a la escuela: nun se trata de sustituyir la tradición cola teunoloxía, sinón d'usar la teunoloxía pa deprendela y espardela meyor.
03
Cómo enseñamos
Les clases son individuales, online y en direutu. Nun hai grupos nin ritmos impuestos: cada alumna y alumnu avanza al so, dende cero absolutu hasta'l perfeicionamientu. Enantes d'entamar, faemos una charra previa pa conocer el to puntu de partida — nun hai pruebes d'accesu.
Deprendemos gaita asturiana y tin whistle como dos tradiciones propies, cada una col so orixe y el so repertoriu, ensin fundiles nin tratales como si fueren lo mesmo.
Tever Díaz García
Fundador
Gaiteru, docente ya investigador asturianu.
Fiesta del Cébranu, Teverga, años 80. El padre de Tever, portando ún de los ramos tradicionales.
Orixe d'una idea
D'ónde vien el nome
Cuenta Tever Díaz García, fundador:
«Fui profesor de gaita nes Escueles Municipales de Proaza y Teverga ente 2017 y 2022. Nesa etapa emprimé un trabayu d'investigación propiu, Músicos Populares de Proaza y Teverga. Ente les xeres que tuvi que facer tuve buscando semeyes y histories de los gaiteros y músicos que tocaron nesos conceyos.
Buscando imáxenes pa esi trabayu alcontré una semeya de los años 80: el gaiteru de Teverga Juan Huerta, na procesión de la fiesta del Cébranu, patrona del conceyu de Teverga. Ente les persones que salen na semeya, fíxome na que ta portando ún de los ramos tradicionales, en centru de la imaxe. Esa cara suéname muncho, paro un segundu y dame cuenta de qu'esa persona ye'l mio padre.
Ver el mio padre delantre del gaiteru fáime remembrar cómo caltenemos na mio familia la tradición d'ufiertar el ramu. Nesi momentu dame cuenta de que la mio familia yá llevaba munchos años caltiniendo esa parte del folclor del conceyu de Teverga.
Ye por eso que'l nome d'esta Escuela de Música Tradicional ya Innovación nun pue tener otru nome que nun seya «Fervienza». Ye l'apellíu de la rama familiar del mio padre, asina lo llamaben, y nun pudimos poner un nome meyor a esti proyeutu.»
Fervienza:
El términu Fervienza (o la so variante gallega Fervenza y llionesa Fervencia) fai referencia a una cascada o saltu d'agua, especialmente aquel onde l'agua cai con tal fuercia que produz espluma y burbuyes, dando la impresión de que ta ferviendo.
Etimoloxía: provién del llatín fervere, que significa «ferver» o «tar en ebullición».
Puedes siguir el trabayu de Tever
Dos llinies, un mesmu camín na música
Tever Díaz García lleva'l so trabayu como músicu profesional y como investigador en sitios web propios, fuera de la escuela. En tever.es espubliza la so obra como gaiteru y compositor, cola so discografía y un blog sobro gaita asturiana y música tradicional.
En labs.tever.es documenta la so llinia d'investigación n'informática aplicada a la música, dende la trescripción automática hasta otros proyeutos d'innovación teunolóxica sobro música tradicional. Puedes siguir cada llinia por separao si t'interesa conocer más.
Investigación n'informática musical
La so llinia d'investigación en trescripción automática de música ya informática aplicada a la tradición.
Ver labs.tever.es →